Veðursjármynd

Baldur Ragnarsson

Veðurstofa Íslands á eina veðurratsjá sem er staðsett á Miðnesheiði skammt frá Flugstöð Leifs Eríksssonar og er hún notuð til að fylgjast með úrkomu í rauntíma.

Veðursjáin skimar 240 km geisla, sem sýndur er með upplýstu skífunni á myndinni. Ratsjárgeislinn endurvarpar merkjum frá úrkomu en einnig frá öðrum hlutum sem verða á vegi hans, t.d. fjöllum. Þetta verður að hafa í huga þegar Snæfellsnes og fjallgarðurinn í kringum höfuðborgarsvæðið er annars vegar því þar rekst geislinn á fjöllin og endurvarpið verður mjög sterkt þrátt fyrir að úrkoman sé engin. Litakvarðinn neðst til hægri á myndinni sýnir styrk endurvarpsins. Því hærri sem talan er því meiri er úrkoman. Ef liturinn á kortinu er blár bendir það til þess að úrkoman sé lítil, en ef liturinn er rauður er mikil úrkoma. Þrátt fyrir að endurvarpið sé sterkt getur komið fyrir að engin úrkoma falli til jarðar, en þá gufa vatnsdroparnir upp á leið sinni niður.

Veðursjáin sendir út keilulaga geisla og nemur geislinn því ekki merki nálægt yfirborði jarðar eftir því sem fjær dregur frá ratsjánni. Í 100 km fjarlægð frá veðursjánni nemur geislinn ekki merki sem eru undir 1000 m frá yfirborði sjávar, í 200 km fjarlægð frá veðursjánni nemur geislinn ekki merki sem eru undir 4000 m frá yfirborði sjávar. Þetta skýrir af hverju lág ský, til dæmis þokuský, í námunda við veðursjána koma ekki fram á myndinni; þau liggja það nærri jörðu að geislinn nemur ekki merkin frá þeim.

Notagildi þessara mynda er mest þegar fylgst er með úrkomu sem kemur úr suðri og suðvestri.

Á Veðurstofu Íslands er unnið að því að þróa aðferðir til að bæta upplýsingarnar sem berast frá veðursjánni. Markmiðið er að leiðrétta þau tilvik þar sem endurvarpið gefur rangar eða villandi upplýsingar um úrkomumagn.

Mynd úr veðursjá Veðurstofunnar á Miðnesheiði.

Myndin er að jafnaði uppfærð á 15 mínútna fresti. Vinsamlegast notið glæðihnapp vafrans.

Veðursjármynd

Til baka, Senda grein, Prenta greinina

 

Veðursjármyndir eru frá veðurratsjám Veðurstofu Íslands sem staðsettar eru við Keflavíkurflugvöll og Teigsbjarg (sjá leiðbeiningar). Á samsettum myndum er þeim blandað saman við hitamynd frá veðurtunglinu Meteosat-9 sem tilheyrir Evrópsku veðurtunglastofnuninni EUMETSAT.




Aðrir tengdir vefir



Ekkert skjal tengt
Þetta vefsvæði byggir á Eplica